Plantun de Prouvènço

Pèr coumpara dos planto d'encò nostre

Polygonum aviculare & Plumbago europaea

Lengo-de-passeroun

Polygonum aviculare

Polygonaceae

Àutri noum : Tirasso, Tirasseto-de-camin, Sanguino, Erbo-nousado, Trenco-taio.

Noms en français : Renouée des oiseaux, Traînasse.

Descripcioun :
La lengo-de-passeroun es uno planto coumuno que trachis dins li champ, ermas e pelouso. Pòu èstre siegue drecho, siegue pòu rebala, tirassa au sòu. Fai de pichòti flour mistoulino blanco o roso. La taio di fueio èi proun chanjadisso segound li relarg (fotò).

Usanço :
Es uno planto manjadisso, mai coume pèr tóuti li Polygonaceae, caup d'acide óussali e n'en fau pas trop prendre. Ei couneigudo pèr ajuda au caiamen dóu sang, lucha contro l'inflamacioun, lou mau de garganto, lou tussi, la cagagno...

Port : Erbo
Taio : 5 à 60 cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Polygonum
Famiho : Polygonaceae

Ordre : Caryophyllales

Coulour de la flour : Blanco
Petalo : 5
Ø (o loungour) flour : Pancaro entresigna
Flourido : Printèms - Estiéu - Autouno

Sòu : Ca
Autour basso e auto : Pancaro entresigna
Aparado : Noun

Liò : Champ - Escoumbre e proche dis oustau - Colo
Estànci : Termoumediterran à Aupen
Couroulougi : Cousmoupoulito
Ref. sc. : Polygonum aviculare L., 1753

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.